Заев: Со Оливер Спасовски на чело, извршната власт е во сигурни раце

0
61

Со изборот на преодната влада и со Оливер Спасовски на нејзино чело, извршната власт е во сигурни раце, особено кога станува збор за нејзината првенствена обврска да се организираат фер, демократски и ефикасни избори кои ќе обезбедат брза и легална институционална постапка за избор на нова влада. Оваа преодна Влада е во сигурни раце и кога е во прашање континуитетот на напредокот на земјата кој бележи силен нагорен тренд, напиша на фејсбук претседателот на СДСМ Зоран Заев.

Тој утринава ја потпиша оставката на местото претседател на Влада, а попладнево беше избрана техничката Влада која треба да ги спроведе предвремените парламентарни избори кои се закажани на 12 април.

Сега сите политички структури во Владата имаат обврска да обезбедат натамошно јакнење на институциите, а не опструирање внатре во институциите. Апелирам опозицијата да биде одговорна и да не го злоупотребува овој преоден период.

Влегуваме во година во која со нова изборна победа СДСМ ќе продолжи да го прави најдоброто за секој наш граѓанин за да потврдиме дека големите успеси не беа случајни, туку дека се здрави насоки за избраниот, исправниот пат.

Македонија и македонските граѓани, целата наша нација е достојна за евро-атлантското семејство на сојузници и пријатели. Граѓаните се знаменосци на прогресот и на демократските вредности и токму тие со одлуката на 12 април ќе бидат засилувач на нашата внатрешна и надворешна интеграција, напиша Заев на Фејсбук.